Kulttuuri

Pekka Juntin Soratien päästä -novelli: Luonnonystävä

Mie sain riistanhoitopiiriltä viirin ansiokhaasta riistanhoitotoiminnasta ja se meni mulla niin tuntheissiin, että piti mennä pannuhuoneesseen märsäähmään, ettei vaimo näe. Märisin menheen ja iloittin, että net vihon ja viimein piirissä huomasit, minkälaisen pyyteettömän työn molen tehny luonnon hyväksi koko miehuuteni ajan. Ei se pysähy pelkhään työhön mettänhoijon parissa, riistanhoito on ollu yhtä tärkeä. Mie en valehtele, jos mie sanon, että luonto on ollu minun koko elämä.

Piti mennä pannuhuoneesseen märsäähmään, ettei vaimo näe.

Molen kulkeissani huomanu, että riistaelämässä on tietyt lainalaisuuet, joitten mukhaan sielä häätyy toimia. Ensinnäki suet pittää tappaa kaikki ko niilei tehe mithään. Ketut kansa, net riethaat syövät meiltä jänekset ja mitä se Armas sitten ajokoiritten kansa pyytää.

Mutta ketun hävittäminen onkin helpommin sanottu ko tehty. Aina se luontopiru jonku kiusala säästää. Myrkkypyynti oli tehokas tapa, mutta etelän pössit kielsit senki. Aivan samanlaista vihreätä houruamista ko kieltää vesakkomyrkyt. Meni laakista vaikeaksi koko luonnonhoito! Vissiin net etelän venykheet halvaa, ettei meilä olis täälä muuta ko kettuja ja pensikoita. Mutta ei onnistu! Mie luppaan, että niin ei käy niin kauanko Ville-Kyösti pittää täälä mettistä huolen.

No sitten on ahma. Son semmonen ruma könkkäsijä olemassaan. Se ei sovi poronhoitoaluheele eikä mihinkhään. Karhuja voi joku olla, ko se on niin uljas. Se on vähän sama ko isojen petäjitten kansa. Koskhaan ei piä olla niin ahne, että lyöpii vaaran kaikki petäjät kumhoon. Muutaman ko jättää, niin niitä on mukava sitten katella jälkheenpäin, että oli ne mettät joskus erilaisia.

Hirvikanta häätyy pittää kurissa, ettei net syö taimikoita. Jänistä häätyy tappaa armotta, ettei tule rutto. Talvela jäneksiä pittää ruokkia ja hirvile kantaa suolaa, ettei kortto niitä peri.

Kanahaukka pittää tappaa ja kaikki muukki jolla on kynnet vastakkain. Joukhaisia pitäs ampua kovasti, että hanhet sais elintillaa ja met pääsisimmä taas ampuhmaan hanhia. Molen tehny Mämmämmämhään alotheen hanhirimpien tyhjentämiseksi valkosesta roskaväestä.

Korppi on pesärosvo, ei muutako jänkhään. Varis on korpin halpakopio, mithääntekemätön tyijhän rääkyjä. Taphoon. Tintin voi piettää ja punatulkun, net on nättejä lintulauala talvisyämmellä ko mettä on muuten ko pysthöön kuollu. Ilveshän ei täälä viihykhään ko tämä on poronhoitoaluetta, mutta periaatteessa seki on tapettavien listala.

Korppi on pesärosvo, ei muutako jänkhään.

Soon sillä laila, että ihminen on pantu tänne pitähmään luonto kurissa. Eihän siitä mithään tulis, jos järjettömät elukat sais tuola vaphaasti rellestää. Luonto toimii parhaiten sillon, ko yksi on järkenä ja muut tekkee niinkö sanothaan.