Kulttuuri

Pekka Juntin Soratien päästä -novelli: Jami tykkää maata auringossa

Koirankoppi pittää siirtää. Jami tykkää maata auringossa. Koppi pittää siirtää vajan seinäle. Missä se ukkoki on sillon ko sitä tarvithaan. Vanhaa ihmistä täälä revityttää.

– Isä, isä! Tule auttahmaan.

– Äiti, isä on kuollu.

Mikä se tuoki akka luulee olevansa. Mistä se tuohon pölähti. Onko tuo se naapurin Ruottin serkku, se Pirjo. Sehän se ruukaa kesälä täälä persettä keikuttaa. Onpa se vanhantunu.

Niin katoaa kauneus, halla viljan vie. Tuonelan maille, käy meidän tie.

– Kuas solet? Oleksie Pirjo?

– Äiti solen mie, Tuulikki.

– Jaa jaa, niin.

Koiran koppi pittää siirtää, Jami tykkää maata auringossa. Missä se Jami on, onko se taasen menny jäniksen perhään. Niin tietekki, sielä son aina. Ei malta heittää pois.

– Jami, tule pois, ei kesälä saa pyytää, höpö! Tule, tseh tseh. JAMII!

– Äiti Jami on kuollu. Se meni sillon isän kansa samhaan avanthoon. Eksie muista?

Mitä se tuoki tuossa selvittää. Ei hetken rauhaa ole omassa koissa. Eikö se saa krannissa ruokaa ko tuossa ajeeraa. Sais se ukkoki tulla. Auttas vähän. Auttas siinäki hommassa hihhih! Kutittaa siitä paikkaa. Aina kutittaa siitä. Taian olla vähän huolimaton emäntä. Oi sillä on ihana soiro. Aijai se tekkee hyvvää.

– Isälä on ihana soiro. Kuuleksie, tiäksie mikä soiro on? No mulkku!

– Äiti älä!

Äiti Jami on kuollu. Se meni sillon isän kansa samhaan avanthoon. Eksie muista?

Äiti ja äiti, mikä äiti mie tuole olen. Helketin velttaperse. Onneksi lähti. Missä se Jami on, pittää lähteä kattohmaan. Tuossahan se minun ämpäri on. Onkhaan hillat jo kypsiä? Kylläpä se paistaa, niin on sievä keli. Onkhaan net jo kypsiä?

– ÄITI, ÄITI!

Mikä sielä huutaa? Hätä sillä on. Onko sakut tulheet kylhään taasen? Herratun aika sakut on tulheet. Kaiken polttavat, elukat tappavat. Missä Tuulikki on, entä Matti? Ei hyvä Jumala, älä anna sakun niitä löytää. Hyvä Jumala, anna meän selvitä, anna vielä kerran.

Pittää päästä piihloon. Tuola se huutaa taasen. Pittää päästä piihloon. Ei saa antautua. Jänkhään polkevat jos sauttavat.

Missä Matti ja Tuulikki on? Isä, tule kotia, tule auttahmaan. Isä rakas, minun ukko. Tuossa on piilo. Menen kivenkolhoon ja pysyn sielä. Ei saku voi tänne osata. Ei voi osata.

O’herran jeekatti, mikä se huippaa. Väsyttää, mikä se alkoki niin.

Isä? Isäkö siinä? Minua kutitat taasen riestas, hihih, tule peiton alle ottahmaan, mikä on sinun. Sie olet niin lämmin.

Isä, sakut on kylässä.

Vie minut turhvaan.

Hyvä Jumala, anna meän selvitä, anna vielä kerran.